D’UNICEF schützt d’Kanner
Säit Oktober 2023 hu sech déi bal deeglech Rakéitenugrëff tëscht Israel an der libanesescher Hezbollah alarméierend verschäerft. Humanitär Hëllef ass entscheedend, fir de betraffene Kanner déi liewenswichteg a séier Ënnerstëtzung ze bidden, déi se esou dréngend brauchen.
Tragesch Zuelen
Méi wéi 100 Kanner goufen ëmbruecht
Méi wéi 300 Kanner goufe blesséiert
Méi wéi 120.000 Persoune goufe verdriwwen
Noutsituatioun am Libanon
Loosst eis d’Kanner elo schützen
Spent nach haut, fir Liewen ze retten an eng wichteg Ënnerstëtzung ze bidden
Eng dramatesch Eskalatioun
An de leschten Deeg huet sech de Konflikt dramatesch zougespëtzt. Säit dem 23. September ginn de Süde vum Libanon, d’Bekaa-Regioun an déi südlech Viruerter vu Beirut duerch israeelesch Ugrëff getraff. Dësen Dag war am Libanon dee schlëmmste säit 18 Joer. Aktuell kommen an dësem Konflikt am Libanon all Dag méi Kanner ëm d’Liewe wéi deemools wärend dem Konflikt vun 2006. D’Spideeler sinn duerch déi héich Unzuel u Verletzten iwwerlaascht.
„Ech melle mech aus dem Libanon, fir op d’Situatioun vun de Kanner opmierksam ze maachen, déi staark ënner der Eskalatioun vun der Gewalt leiden. D’Auswierkunge fir hiert physescht a psychescht Wuel sinn tragesch.“ – Ettie Higgins, stellvertriedend Vertriederin vun der UNICEF am Libanon
Verdreiwung, Trauma an Aarmut
Dausende Famillen, déi gezwonge waren, hiert Doheem ze verloossen, souzen duerch déi massiv Flucht a méi sécher Gebidder stonnelaang op de Stroosse fest. Bannent 72 Stonnen si méi wéi 70.000 an Noutënnerkonften ënnerkomm, laut der Unitéit fir d’Geréieren vum Katastropherisiko am Libanon.
Dës Verdreiwung voller Panik huet bei villen d’Trauma vum Krich vun 2006, deen d’Land deemools scho schwéier getraff hat, erëm opliewe gelooss. Scho virun dëser neier Well vu Gewalt hunn 20.000 libaneesesch Kanner ënner enger staarker psychescher Belaaschtung gelidden an haten Angschtzoustänn souwéi schwéier Depressiounen. Dës Zuel ass an de leschten Deeg warscheinlech geklomm.
Säit bal fënnef Joer duerchlieft de Libanon déi schlëmmst wirtschaftlech a sozial Kris an der Geschicht vum Land, déi Famillen an eng extrem Prekaritéit gestierzt huet. Haut si 75 % vun de libaneesesche Kanner vun Aarmut bedrot.
„D’Situatioun am Libanon, déi scho kritesch war, huet sech vun enger Kris zur Katastroph entwéckelt. D’Leed vun de Kanner muss ophalen.“ – Edouard Beigbeder, Vertrieder vun der UNICEF am Libanon
Eis Hëllef um Terrain
Säit 76 Joer ass d’UNICEF am Libanon präsent an huet hir Hëllef wéinst der Eskalatioun vun der Gewalt elo intensivéiert. Eis Prioritéit ass et, op d’Grondbedierfnesser ze reagéieren, wéi en Zougang zu Drénkwaasser an Iessen, souwéi d’Verdeelung vu grondleeënden Hëllefsgidder wéi Matrassen, Medikamenter an Hygiènes-Kitten un déi verdriwwe Famillen.
Bis elo (02/10/2024) konnte mir scho follgend Hëllefsgidder liwweren:
- Méi wéi 100 Tonne vun Noutversuergungsmaterial un d’Spideeler
- 6.900 Hygiènes-Kitten,
- 1.440 Kitten fir Puppelcher
- 200.000 Liter Waasser
- 11.000 Decken
- 3.000 Schlofsäck
Dës Liwwerungen hu bis elo ongeféier 50.000 verdriwwene Leit an 150 Ënnerkonften erreecht.
Den Appell vun der UNICEF
D’UNICEF widderhëlt hiren dréngenden Opruff fir eng direkt Deseskalatioun a fuerdert:
- De prioritäre Schutz vun de Kanner: D’Rechter, d’Sécherheet an d’Wuel vun de Kanner mussen, no dem international humanitäre Recht an de Mënscherechter, primär geschützt ginn.
- E garantéierten Zougang zur Bildung fir all Kand: All Kand soll d’Méiglechkeet hunn, ze léieren, sief et iwwer formell oder net-formell edukativ Weeër.
- De Schutz vun zivillen Infrastrukturen, inklusiv Spideeler: UNICEF fuerdert all d’Parteien, déi um Konflikt bedeelegt sinn, op, sech vun all Aktioun, déi de Kanner hiren Zougang zu Bildungs- a Gesondheetsdéngschter géif behënneren, ze ënnerloossen.
- D’Ënnerstëtzung vun de Communautéiten: Eng direkt humanitär Hëllef ass noutwenneg, fir de Zougang zu grondleeënden Déngschter wéi Gesondheetsversuergung, Bildung, Drénkwaasser an Ofwaasserbehandlung ze garantéieren.
